Sigurlisti undir stjórn sterkasta leiðtogans, og meira en það!

Á þessum lista er að finna ALLT!

Eldri borgara, ungt fólk, fólk til vinstri, fólk til hægri og síðast en ekki síst tvo af öflugustu stjórnmálamönnum Íslands; gamli allaballinn, Össur Skarphéðinsson og....

... Eina konan sem að hefur möguleika á að verða fyrsti kvenkyns forsætisráðherrann, einn af sterkustu leiðtogum íslenskra stjórnmála ef ekki sá sterkasti, Ingibjörg Sólrún Gísladóttir.

Hættum að fara með þessar leiðinlegu tuggur sem ekkert er að marka, að Ingibjörg sé ekki nógu sterkur leiðtogi, hún nöldri bara og geri ekkert að viti. Sannleikurinn er sá að hún er eini leiðtogi stjórnmálaflokks á Íslandi síðasta hálfa árið eða svo sem að hefur talað um stefnumál! Ekki heyrir maður mikið frá Geir, Jóni eða Guðjóni Arnari (að undanskildu skítkasti yfir flokksfélaga, sem hafa síðan gengið úr flokknum).

Steingrímur J. stendur sig með prýði einsog alltaf og allt mjög gott sem að hann heldur fram, en það þýðir það ekki að Ingibjörg Sólrún hefur staðið sterkust með sínum málefnum og stefnumálum flokks síns af öllum leiðtogunum. Sumir vilja kalla þetta nöldur en ég segi þetta vera dæmi um sterkan leiðtoga.

Ingibjörg hefur sýnt það og sannað að hún gefst ekki upp þó á móti blási. Þrátt fyrir ungan aldur man ég eftir því þegar að Ingibjörg setti höfuðið undir fallöxina þegar hún setti sjálfa sig í 8. sæti R-listans, eitthvað sem að fáir myndu þora. Hún uppskar þó sem sáði því að R-listinn bætti við sig manni í Reykjavík, Ingibjörg náði inn og hélt borginni.

Ég fann eina skemmtilega mynd frá 25. maí það ár þar sem Ingibjörg Sólrún sést í Ráðhúsinu þegar fyrstu tölur voru birtar og Björn Bjarnason sést fyrir aftan, ekki sá hamingjusamasti á svip.

 

 

 

 

 

 

 

Svo að ég hverfi aðeins aftur til listans sem að samþykktur í kvöld, við fengum ekki bara tölvunörda með okkur til liðs heldur meira að segja einn viðskiptamenntaðan frambjóðanda, G. Ágúst Pétursson, viðskiptaráðgjafa. Það verður einhver að fylgjast með okkur vinstrimönnum. Við kunnum jú ekkert með peninga að fara, ekki satt? 

- Guffi 

Listar Samfylkingarinnar í Reykjavíkurkjördæmum einróma samþykktir

Athugasemdir

[Steindór Grétar Jónsson, 22.2.2007 kl. 01:00]

Þetta á eftir að blómstra hjá okkur í vor.

[Fannar frá Rifi, 22.2.2007 kl. 03:09]

"þegar hún setti sjálfa sig í 8. sæti R-listans" Ekki mjög í anda lýðræðis.  En hef hún er sterkasi leiðtoginn og ég ætla ekkert að fara rægja orð þín, afhverju fór hún ekki strax á móti Össuri þegar hún kom úr borgarstjórn og reyndi við 1 sætið í borgini í kosningunum það ár? Fyrir mig svona mann sem ekki er nóga mikið inn í Samfylkinguni virðist þetta ekki dæmi um mikið þor.

[Stefán Þór Helgason, 22.2.2007 kl. 20:26]

Blessaður Guffi!

Ingibjörg er sá besti leiðtogi sem Samfylkingin gat valið sér. Fylgið hefur sjaldan verið minna. Er orðið jafnlágt VG og stundum lægra. Í könnunum þar sem traust til stjórnmálamanna er skoðað nær hún ekkert upp í Geir Haarde og nær í raun ósköp litlu þar. Það gáfulegasta sem svo kemur upp úr formanninum er að þjóðin treysti ekki þingflokknum (sem verður nánast óbreyttur miðað við þessa lista) eða þá að Sf. sé of pólitísk. Betri leiðtoga fyrir Samfylkinguna er varla hægt að finna, þótt víða væri leitað!

[Eva Kamilla Einarsdóttir, 23.2.2007 kl. 12:14]

ég er glimrandi ánægð með þessa lista, ekki síst er Reykjavík Norður, svona í kringum 15.sætið alveg stórkostlegur

[Guðfinnur Sveinsson, 23.2.2007 kl. 16:07]

Ég vil byrja á að þakka öllum fyrir athugasemdirnar á færsluna mína, skemmtilegra þegar maður fær að rökræða smá.

Stefán, ég vil benda þér á það að aðeins ein skoðanakönnun hefur sýnt Vg hærri en Sf. í fylgi. Það var skoðanakönnun á Blaðinu, og má minnast þess að Blaðið spáði m.a. Stefáni Jón sigri í prófkjöri Sf. fyrir borgarstjórnarkosningarnar. Ekki áræðanlegasti miðillinn í þessum efnum.

Við erum þó sammála um að Sf. valdi sér besta leiðtogann, ISG. Það er satt hjá þér að þetta var smá klaufalegt sem hún sagði um þingflokkinn en hver segir ekki smá steikta hluti öðru hverju, ég minnist þess þegar Geir sjálfur sagði að maður gæti ekki alltaf farið með sætustu stelpunni heim af ballinu.

Það sem þú segir Stefán um að þetta sé það eina sem hafi komið að viti uppúr ISG er eitt af því mesta rugli sem að ég hef heyrt lengi vel. Hló næstum því upphátt. Ég mæli með því að þú lesir greinar eftir hana í blöðunum og hlustir á viðtöl við hana í útvarpi og sjónvarpi. Ef að þú gerir það með opnu hugarfari ábyrgist ég það að skoðun þín mun breytast.

Kæri frændi (Guðmundur), ég þakka athugasemdina. Ég tek ekki undir orð þín að Samfylkingin sé stóriðjuflokkur og þar langt í frá. Lang stærsti hluti flokksmanna í Samfylkingunni eru umhverfisverndarsinnar, ég nefni sem dæmi fólk með mér í stjórn Ungra jafnaðarmanna í rvk og auðvitað okkur mæðginin einsog þú þekkir.

Það að við höfum hafnað Össurri er algjör vitleysa. Þriðjungur flokksins stóð á bakvið hann í formannskjörinu og miklu miklu miklu fleiri sem standa á bak við hann í flokknum. Össur er í forystu flokksins, leiðir annan listann, er þingflokksformaður Sf. og einn af okkar öflugust mönnum!

Það er mikið rétt hjá þér að Björk er góður málsvari í málefnum eldri borgara, en langt í frá að það sé rétt að hún sé sá eini. Veit ekki hvort þú last Moggann í dag, en ég bendi þér á grein e. ISG um málefni eldri borgara og þá aðallega í sambandi við lífeyrismál. Fín grein, er á miðopnu moggans.

Skila kveðjunni, og sömuleiðis!

Að lokum vil ég halda þeirri skoðun minni á lofti, og stend og fell með henni, að Ingibjörg Sólrún er besti leiðtogi sem að Sf. hefði getað valið sér!

- Guffi

[Stefán Þór Helgason, 24.2.2007 kl. 12:01]

Að sjálfsögðu er ekki alltaf að marka skoðanakannanir og ég er sammála þér með Blaðið þ.e. að kannanir þeirra eru ekki þær áreiðanlegustu. Samt sem áður er þetta í takt við fylgishrun SF síðustu mánuði og fylgisaukningu VG. Auðvitað finnst mér sjálfstæðismanninum SF ekki geta hafa valið sér betri formann. Það er augljóst. Sérstaklega eftir að Davíð hætti þá hefur Ingibjörg engan til að ráðast á úr röðum Sjálfstæðisflokksins og þetta tveggja turna tal dettur upp fyrir.Ég sagði alls ekki að þetta væri það eina. Mér finnst það vera það gáfulegasta sem hún hefur sagt því að ég er hjartanlega sammála. Ekki treysti ég þessum þingflokki fyrir húshorn og hún fattar að þjóðin gerir það ekki heldur. En gott að geta komið þér til að hlæja :D

Ég hef lengi fylgst með Ingibjörgu í útvarpi, sjónvarpi og í blöðum og séð ýmislegt gott koma frá henni. Þetta með þingflokkinn er eitt af því en það er samt eitthvað sem menn deila um. Ég er t.d. ekki viss um að þingflokkur formannsins sé sammála. Hinsvegar veist þú jafnvel og ég að maður fer ekki alltaf með sætustu stelpunni heim af ballinu, það er eitthvað sem menn deila ekki um.